Sretan povratak
Došal je sokol iz Bosne
na lipe Mare dvorove,
on ide na nje naranžu.
Mare prokine naranžu:
»Prokljeta bila, naranža, 5
i vitri ki su u tebi!«
»»Ne kuni, Mare, naranžu,
neg kuni mene sokola,
ja jesan, sokol iz Bosne,
ja san joj sio na grane, 10
a nisu vitri iz gore.««
»Tako ti bora, sokole,
jesi mi vidi dragoga?«
»»Kako ga nisan vidija,
kada mu službu ja činjah.«« 15
»Tako ti bora, sokole,
je se moj dragi oženi,
a mene Maru pozabi?«
»»Tvoj se je dragi oženi,
i tebe j’ Maru pozabi.«« 20
»Poj mi sad zbogon, sokole,
i reci momu dragomu,
neka se ženi, neka ga,
škura mu nojca vesela,
teški mu zdisi na sarcu, 25
kako i meni divojki.«
Otide sokol s naranže,
pa se prošeće u Bosnu,
kada je doša u Bosnu,
njemu mi veli Jive mlad: 30
»Tako ti bora, sokole,
je li mi Mare umarla,
oli se mlada odala?«
»»Nije ti ona umarla
nit ti se mlada odala, 35
nog te je teško proklela:
škura ti nojca vesela,
teški ti zdisi na sarcu,
kako i njojzi divojki.««
Kad je to doču Ive mlad 40
on se prošeće iz Bosne,
na lipe Mare dvorove.
To ti je Mare na dvore;
žutu je kosu pristrala,
gorku je suzu prolila 45
po njejin licu rumenem.
»Tako ti bora, Marula,
ča s' mlada majku kopala,
oli si s braćo'm dijena?«
»» Ja jesan majku kopala, 50
s mojon san braćom dijena,
ma meni majke milo ni,
ni mojih bratov rojeni,
nogo md milo dragoga,
s kojin san bila v jubavi 55
or mala moga diteta,
do sada vela junaka,
a sad se s drugon oženi
a mene j' Maru pozabi.««
»Da bi ga, Mare, vidila, 60
bi li ga mlada poznala?«
»»Da bi ga mlada vidila,
kako gah ne bi poznala;
visok je kako jelvica,
rumin je kako jabuka, 65
mudro mu j’ oko u glave,
ne para, dušo, nog da s’ ti!«
Kad je to doču Ive mlad,
s jednom je rukom garljaše,
drugu joj njadra mećaše: 70
»O Mare, moja divojko,
o moje parvo jubjenje,
o moja kito murtele,
ni se ja s drugon oženi,
ni tebe Maru pozabi!« 75
Датотека:Murat Sipan vinjeta.jpg
