Mladić mora zapustiti djevojku
(Bersečka).
„Ćera jesan s dragin govorila,
Danas ga nis čula ni vidila:
Da bin mu ja leh konja vidila,
Kako da bin dragoga mojega.“
Zela j’ vidro, šla je po vodicu, 5
Tut na vodi drag joj sedjaše:
„Božja pomoć, o dragi junače!“
„„Bog te primi, o mlada divojko!““
„Čin san ti se, drag moj, zamirila:
Al da nisan prij’ na vodu prišla, 10
I na vodi konja napojila?“
„„Nisi mi se ti s tin zamirila,
Lego majka mi te ne da zeti,
Mila majka, i rojena sestra.
Leh te prosin, ljubo moja draga, 15
Ne ženi se izvan roda moga,
Izvan roda, grada devetoga.
Još te prosin, ljubo moja draga.
Kada budeš pod vincen divojka,
Ne hodi mi mimo dvora moga, 20
Ne žali mi tužna srca moga,
Zač će puknut tužno srce moje;
Zlati prsten, ki mi je pol’ tebe,
Drži si ga za spominje moje!““
Još ne projde nedeljica dana, 25
Da je ona nevestica mlada,
Izvan roda devetoga grada,
I mu projde mimo njega dvora.
Mila majka na poneštri staše,
Sinu svomu tiho besedjaše: 30
„Viste, Ive, pod vincen divojku!“
„„Mučte, majko, mukom zamuknula!
Vi ste meni svemu tomu kriva,
Da ni ona ljuba moja bila.
Prokleta je svaka taka majka, 35
Ka omrazi milo ter i drago:
Neka ljubi ča je komu drago. ““
To izusti i dušicu pusti.
Iz iste zbirke.
Датотека:Murat Sipan vinjeta.jpg
