U paklu nahodi stvar se ova neumrla,
človik go u vodi gdi stoji do grla.
Dni mu se zlo traju greznući sred vira,
usta mu pucaju, od žeđe umira,
i kad se napiti oči mu požude,
voda mu otiti daleko tja bude;
vrh njega pak voće tuj raste na grani,
ko ubrat kad hoće, grana se odstrani.
Od tebe, skupče, toj pripovis sve veli,
ki vik hoć, da duh tvoj od veće sve želi;
čim blaga dosta imaš, skupos te tač vlada,
pri njemu da umiraš od žeđe i glada.
Koja stvar vik na svit huđa se može rit,
uboški neg živit, za bogat pak umrit?