Kako je u raju i paklu
0001 Šetali se tri božji anjeli
0002 Okol dvora smiljene Marije:
0003 „Smiluj nan se, Isus i Marija,
0004 Spodajte nan sve kluče od raja,
0005 Gremo vidit, kako je va raju.“
0006 Mili Bože! Al je v raju lipo!
0007 Na sred raja sede tri mlade divojke:
0008 Jedna češa žute kite svoje,
0009 Druga pere bila lišca svoja,
0010 Treta šije bilo ruho svoje.
0011 Ka j’ česala žute kite svoje,
0012 Ta j’ sirote lipo očesala,
0013 S tin je mlada raja zaslužila.
0014 Ka je prala bila lišca svoja,
0015 Ta j’ sirote lipo umivala,
0016 S tin je mlada raja zaslužila.
0017 Ka je šila bilo ruho svoje,
0018 Ta j’ sirote lipo obukala,
0019 S tin je mlada raja zaslužila.
0020 Šetali se tri božji anjeli
0021 Okol dvora smiljene Marije:
0022 „Smiluj nan se, Isus i Marijo
0023 Spodajte nan sve kluče od pakla.“
0024 Spodal jin je sve kluče od pakla,
0025 Šli su vidit, kako je va paklu.
0026 Mili Bože, al je v paklu grdo!
0027 V paklu gore tri mladi junaci,
0028 Jedan gori noge do kolena,
0029 Drugo gori ruke do ramena,
0030 Treti gori telo do očima.
0031 Koj je goril noge do kolena,
0032 Oni da je tuje uzimao;
0033 ’Noga kunu njegovi susedi,
0034 Da bi njemu raja poželiti
0035 I da bi mu va pakle goriti.
0036 Ta ki gori ruke do ramena,
0037 On je tukal oca i majčicu.
0038 Oni jesu njega proklinjali;
0039 Da bi mu ruke raja poželile
0040 I da bi mu va pakle gorile:
0041 Kad bi pravo, da bi izgorile.
0042 Koji gori telo do ramena,
0043 On je ljubil na veri divojke
0044 I po veri ih je ostavio.
0045 Ostale su male sirotice,
0046 One jesu njega proklinjale:
0047 Ki je njin kriv, da po svitu hode,
0048 Da b’ mu tilo raja poželilo,
0049 Da bi njemu na paklu gorelo,
0050 Ko bi pravo, da bi izgorelo.
0051 U polju je jena lipa crikvica,
0052 Lipa crikva, lipo zazidana,
0053 Bolje b’ stvoril, da crikvu razori,
0054 Neg divojki da viru prelomi,
0055 Crikva bi se druga sagradila,
0056 Trikrat liplja neg je prvo bila,
0057 A divojki nikdar vera povrnila.
