Tam u Splitu gradu

* * *

[Tam u Splitu gradu]

Tam u Splitu gradu,
Teška žalost biše,
Kad slipa Marija
Dušicon diliše.
Iša joj je otac 5
Doli na bikariju.
Kada kući dojde,
Nade ćer Mariju.
Na sri' kuće leži,
Kano bor i jela, 10
Na vratu jon visi
Zlatna kadinela.
Marina traversa,
Na njoj su mušice,
Ča su je vezale 15
Marine ručice.
Volija bi otac
Da je umrla Vice
Nego ćer Mariju
Gledati u lice. 20
Kad su je pronili
Kraj svetoga Petra,
Plakalo je Maru
Do malog diteta,
Kad su je pronili 25
Kraj svetoga Frane,
Svi mladi mornari
Vijaju zastave,
Kad su je pronili
Priko spliske rive, 30
Svi mladi mornari
Skidaju bandire.
Skidaju bandire
U po jašpe broda,
Jer je umrla 35
Marija gospođa.
Marijo, Marijo,
Ala te grihota,
Svi te momci plaču
Od Velog Varoša. 40

Датотека:Murat Sipan vinjeta.jpg

---

Референце

Извор

Ivan Pažanin, Paljetkovanje usmene poezije Vinišća, Čakavska rič: Polugodišnjak za proučavanje čakavske riječi, Vol. XVII No. 2, 1989., str. 13-14.